ضغط شغل

:: مزاجي :: محتار

الاسبوع هذا مر علي بشكل مب طبيعي، مشاكل الشغل انصبت بشكل غريب
بديت أفكر ..

ليش الموظفين مش متعاونين معاي ؟ ليش مايحاولون يساعدوني ؟ غريب الوضع.

أو هل الخلل فيني ؟ هل انا في منصب مب قده؟ قريت مقاله في كتاب تقول
" اذا حسيت انه الشخص مب منتج، فالعيب مش منه العيب من الوظيفه اللي يشغلها أو العمل اللي يقوم فيه مش مناسب إمكانياته"
عدة اسئلة دارت في راسي، تدور كلها اني مش قد المسؤولية وفكرت بالانسحاب .

ولين الحين تدور هذي الاسئلة براسي لكن بشكل أقل بعد ماعقدت اجتماع مع الموظفين، وفهمت امور كانت خافيه علي
طبعا مب كل الامور عجبتني، ولا كل المشاكل انحلت.
لكن اتمنى انه يتحسن الوضع احسن من جذي، احاول اجتهد قد ما اقدر ، احيانا احس اني متميز في إمكانياتي، واحيانا احس انا ماخذ اكبر من حقي.

أتمنى بنهاية هالاسبوع أعصابه ونفسيتي تهدى واقدر اركز اكثر في شغلي واوصل للي ابغيه.

جدولي الاسبوعي

::. مزاجي ::. مسترخي

في أفكار وايد تشغل بالي كالعاده .. بس هالمره بغير وبحاول اكتب يومياتي في نهايه الاسبوع .. :)

جدولنا الاسبوعي في نهايه كل اسبوع مايتغير .. كل واحد فينا يرد من الدوام يريح اشوي
ويخلص شغله اذا عنده شغل .. والوعد آخر الليل .. في السينما
هالمره غيرنا وخلينا القعده في سيلين .. ولو انها مش اول مره .. بس هالمره كانت احلى
القعده .. والضو قدامك .. والشباب من حوالينك .. نتذكر الذكريات الحلوه
ونعقر في اللي مش موجودين .. ناس فاضيه :)

والجمعه .. كانت وجهتنا لمحاضره الشيخ الدكتور سعيد بن مسفر القحطاني ..
كانت المحاضره بعنوان " إنا كفيناك المستهزئين .. " وطبعا كانت عن عن الكاريكاترات الدنماركيه
المحاضره كانت حلوه وخفيفه .. والشيخ كان حديثه طيب ومشوق

ولو انه كنا مرتبين نفسنا نشوف نهائي البطوله الافريقيه بين مصر وساحل العاج ..
بس ضحينا بالمباراه علشان المحاضره .. ومبروك للمنتخب المصري اللي سواها :)

ومن المحاضره رحنا تعشينا .. وبعدين للسينما الفيلم المصري "حرب أطاليا" ..
الفيلم الصراحه تغيير عن الافلام المصريه في القصه والعرض .. عن نفسي عجبني الفيلم ..

يوم السبت طبعا الواحد يريح ويعوض المجهود اللي يبذله طول الاسبوع في الشغل

أرجل وعجلات

:: مزاجي :: محلي


مهرجان أرجل وعجلات ..
طبعا المهرجان أقيم يوم السبت 04/02/2006 بمشاركة الشيخه موزه والشيخ جاسم بن حمد والشيخه مياسه ووزير الطاقة والصناعة وعدد من الشخصيات المهمة في قطر

المشاركة من قبل مثل هذي الشخصيات المهمة شي حلو يحسسنا بأهمية الحدث
لكن اللي شغل بالي، وين الأهمية من هذا الحدث ؟ علشان كل هذي الشخصيات تكون موجوده ؟
وكم انصرف عليه ؟ التجهيزات والترتيبات إشكثر كلفت ؟
أتوقع لو تبرعوا فيها يمكن كان احسن


وشغله ثانيه شغلت بالي وين التفاعل والمشاركة من قبل مثل هالشخصيات في المظاهرة السلمية لمقاطعة البضائع الدينماركية ؟
اللي كانت يوم الجمعه ، حتى الاستنكار والشجب ماقمنا نشوفه هالايام.
شي غريب

هاليومين مادري ليش مهتم في السياسة وايد
يمكن لاني احس اني مب متفاعل مع اللي صاير في العالم العربي، فحبيت أزيد من ثقافتي السياسية
يمكن مب عارف

بعيد عن السياسة لمعشوقة الجماهير كرة القدم
للأسف الموسم هذا مش موسم الفرق اللي أشجعها لا في الدوري المحلي ولا البطولات العالمية
الغرافه للأسف في المركز السادس ومستواه مش ولابد
لكن لين الحين التفاؤل موجود وراح ننتظر الاسابيع الجايه ايش راح يصير

بداية أسبوع جديد

:: مزاجي :: عادي

بداية أسبوع جديد ..

مع بداية كل يوم أحب اكون متفائل ..

طبعاً يعتمد على حسب المزاج والنفسية ..

في معظم الوقت المزاج ليمت داون .. لكن الواحد يحاول ..

وايد شغلات شاغلة بالي .. خصوصا أمور الشغل ..

اتمنى إني اخلصها بالشكل اللي يرضيني ..

أدعي لعمري أنه الله يوفقني ..

تجربتي الاوله

مزاجي :: سياسي ::

صباح يوم السبت ..

مثل كل يوم ثاني .. احس اني ماعرف ايش راح اسوي ..

فتحت على قناة الجزيره .. وشفت برنامج الجزيره هذا الصباح ..

آول مره آشوف البرنامج .. حبيت البرنامج والتقديم ..

ولفت إنتباهي فقرة .. " مظاهرات المسلمين ضد الدنمارك " ..

طبعاً سرحت بفكري .. ياسبحان الله ..

بهالخذول والانصياع صرنا .. لدرجة إن نطلب منهم الإعتذار بس .. !!!

شي غريب الصراحه .. الواحد آحياناً يتمنى إنه مانولد في هالزمن كذليل ..

ياسبحان الله اشلون نلوم حكامنا على انصياعهم وخضوعهم .. ومانلوم انفسنا على عدم التحرك بشكل ايجابي بخصوص الموضوع ..

سلاح المقاطعه ..أكيد سلاح فعال .. لكن هل هذا هو الحل ؟!

ليش مانبدى نعتمد على أنفسنا ؟ لين متى راح نعتمد على الغرب ؟

والاكيد إنه الكل صاده إحباط من المقاطعات الموقوته .. شهر شهرين ثلاثه !! .. وبعدي الكل ينسى ؟ أو يتناسى ..

لين متى راح نقاطع لفتره معينه ؟ ليش مانفهم إنه الحلول المؤقته ماتنقع .. ليش مايكون تفكيرنا أبعد من بكره ..

قطع تفكيري هذا .. عرض البرنامج رساله شيخ سعودي معروف للآسف نسيت اسمه ..

بمطالبه من الحكومه الدنماركيه علشان المسلمين يرضون ..

اللي عجبني إنه طالب بآشياء آكثر من مجرد الاعتذار ..

يمكن البعض يعتبرها خياليه .. مثل دعم الحكومه الفلسطينيه الجديده والمتمثله بحماس ..

الصراحه عجبتني فكرته .. وطريقه تعامله مع الموضوع ..

على الاقل قام بشيء احسه أنا مميز ..

من ضمن فقرات البرنامج الكلام عن البلوجزرز "المدونات " ..
ومدى إنتشارها وتآثيرها على الإعلام والصحافة .. وتعتبر من التقنيات اللي غيرت التعامل مع الخبر ..
عجبني الخبر والفكره .. وهذا اللي سويته ..
فتحت لي واحد ..

مادري طبعا اشلون راح استخدمه ولا حطيت له أهداف ..

لكن اتمنى اني استغله بشكل يرضيني ..